سباحين

سبحونة الاخويا الثلاثة وأصعب ما مر عليهم

2011-01-03T13:53:00.000+03:00

سبحونة الاخويا الثلاثة وأصعب ما مر عليهم

بسم الله

كان هناك الواحد والواحد الله في سماه العالي كان فيه رجال اسمه سعود يشتغل في البيع والمشترى و يجيب بضايع من الديار البعيدة ويبيعها بديرته مثل حال اغلب تجار نجد و في وحده من سفراته كان يدور كالعادة على اخويا يسلونه في السفر ويساعدونه لان المسافر اذا صار وحيد ما يدري وش يجرى عليه وكان اقل عدد يكونون ثلاثة مثل وصية الرسول صلى الله عليه وسلم وان الثلاثة يصيرون ركب ..

و بعد ما نشد من اللي نية يسافر لجهة الشام لقى اللي يبي اثنين من اهل الديرة الطيبين وكلن له حاجة في ذيك الديرة وقرروا ينطلقون مع بعض تصير خوة وتسلية وحماية باذن الله ..

انطلق سعود وأخوياه الاثنين مطلق وعبد الرحمن وكان الطريق طويل ولابد من سواليف التسلية واللي تخفف عناء الطريق و كانوا يمشون بسيارتهم الفرت ( ford ) ومع انها سيارة الا انها في ذاك الوقت كانت السيارات مهيب مريحة مثل هالوقت ..

وبعد مسير ساعات النهار كله وتقريبا قطعوا نصف الطريق حب سعود يريح اخوياه ويرتاح هو وحتى السيارة الفرت ترتاح شوي من هالطريق الطويل ..

نزل الثلاثة في جانب الطريق ومعهم معاميل القهوة والشاي و بدوا يسعون في عشاهم وبعد ما تقهوى الثلاثة وارتاحوا وصلوا وشبوا نار تجمعوا عليها يتدفون ويتوانسون بالضو ,, وبدت السواليف من جديد ولكن سعود حب يتعرف على اخوياه اكثر ويبي قصة من واقعهم ما قد قيلت لاحد او قليل اللي يعرفنها عنهم وهنا راح يكون بينهم علاقة اقوى ..

قال سعود : يالربع حنا ما عرفنا بعض من الصغر بس وش رايكم لو يقص لنا كل واحد اشين يوم مر عليك في حياتك او اشين موقف مر عليك واللي بيقال الليلة هنا ما راح يتعدانا ..

مطلق و عبدالرحمن جازت لهم السالفة وقالوا ابدا انت يا سعود دامك راعي الفكرة وحنا نبي نولم السالفة اللي تبي ..

سعود قال: ابشروا والله انا صارت لي سالفة بغيت اموت بسبتها بس ربي ستر ..

بهالبداية القوية تعدل مطلق في جلسته وعبد الرحمن كان منسدح وقرب المركى وجلس يبي يسمع ..

كمل سعود سالفته وقال : انا كنت طالع من الديرة مع واحد من ربعي وكان ابوي الله يرحمه معلمنا ما نقطع سالفة الرجال وش ما صار وكان يأدبنا لو خالفنا ذا القاعدة و يطقنا احيانا وكان هو نفسة لابدينا بسالفة ما يقطعنا ابد وصارت عندنا انا واخواني طبع فينا ما نقدر نخليه وخويي ذا رجال شرواكم كان مخاويني في سفرة من سفراتي للشام و حنا في الطريق وبعد ساعات المشي وقفنا في مكان بين شجيرات وحصيات نتذرى بها عن الهوى اللي كان قوي ذيك الليلة و مثل ما حنا نسوي الحين كان يسولف وانا ارد على سواليفه بمثلها وكان بادي في سالفة مهمه بالنسبة له ومتحمس يتكلم ويروي تفاصيل السالفة وانا كنت استمع له بكل انصات ولكن حسيت بشي يدبي ودخل بين ثوبي وجسمي ثم بدا يرقى يرقى ليييين توسط ظهري وانا ما اظهرت ان فيه شي عشان خويي ما تنقطع سالفته والمشكلة اني حسيت بلدغه و لكني ما تحركت ولا تكلمت ولا حس خويي ابد ..

استمر اللدغ و انا اتحمل الالم وصار جبيني يتصبب عرق وعيني تدمع وخويي يحسب هذا من دفا الضو ودخانها وكان مستمر يسرد سالفته بحماس وجلست استمع ليييييين خلصت السالفة واستاذنته قبل لا تبدا سالفة جديدة ورحت ورى موتري وفصخت ثوبي الا واشوف ذيك العقرب الصفراء اللي فرغت كل سمها في ظهري و تعلقت في ثوب وهي منهكه ولا تقدر تتحرك ..

انا اخذت العقرب وذبحتها ودقيتها وحطيتها على مكان اللدغات ورجعت لخويي وكملت الجلسة معه لين نام وقضيت ليلي انا في ألم شديد وتوجع ولكن الحمد لله اللي فكني من الموت هاك اليوم ...

وبعدها تعلمت ان بعض الاخلاق الطيبة ما ناخذها بتزمت وممكن لوني استاذنت منه من اول ماحسيت بالعقرب كان ما صار اللي صار وخوي مهوب زعل لو قطعت سالفته .. لكن زي ما قلت لكم هو طبع تطبعنا به من الصغر ..

مطلق تحمد لسعود بالسلامه وقال والله سالفتك ذي عجيبة لكن انا عندي لك سالفة اعجب منها بتجوز لكم انت وعبدالرحمن واللي كان الظاهر قبل السالفة ناوي يرقد لكنه الحين في قمت نشاطه بعد ما سمع سالفة سعود ووعد مطلق بسالفة اقوى ..

وبدا مطلق بسالفته وقال : انا في شبابي كنت ربع لي نتنقل في هالبران ونترزق الله .. همن وقف وضحك كنه حس ان بدايته مهيب صحيحه للسالفة .. همن قال : الصدق يالربع انا كنت مع ربع لي حنشل نصطي على الرايح والجاي وناخذ اللي معهم وننحاش وعلى هذا عشنا سنين ولكن مرتن كنا نترصد لعل تجينا صيدة كالعادة وشفنا هاك القافلة اللي جاية من بعيد وتباشرنا واستعدينا ولكن يوم قربت الانا نشوف ونتبين الاهم مهوب ناس عاديين كانوا حنشل مثلنا والمشكلة انهم شافونا ونوونا بشر وعددهم يفوقنا بكثير ولا نقدر ننحاش لانهم جايين بكل سرعتهم واحترنا وش نسوي ..

لو حاولنا ننحاش وصادونا بيذبحوننا اكيد وما فيه الا نستسلم لهم ونعطيهم اللي يبون كودهم يخلوننا في حالنا ..

وهذا اللي صار واستسلمنا لهم على امل نبقى احياء بس ولكن زعيمهم امر بجرنا لمكان بعيد ويوم وصلنا هاك المكان اللي ما فيه ممر بشر ولا حوله احد في هالصحراء .. وخذو اللي معنا وخذوا ملابسنا وبعدين اخذوا كل واحد منا وحفروا له حفره ودفنونا وما بقى الا الراس بس طالع وباقي الجسم تحت التراب وكان كل واحد منا يقدر يشوف الثاني بس ما يقدر يساعد روحه عشان يقدر يساعد خويه و تركونا هالعصابة اللي ما يخافون والله وقالوا هذا جزاكم وراحوا وتركونا ..

ويوم مر علينا الوقت وحالنا الله اعلم بها ولانفعت المحاولات اننا نتحرك من هالحفرة وكلن بدا يعلن توبته ويستغفر ربه وايقنا بالموت وقمنا نتحسف على عمرنا اللي قضيناه في سرقة الناس وقتلهم واذيت المسلمين وصار كلن قدام الحق ويحتري الموت ..

يوم جا الليل جتنا الذيابة ولقتنا فريسة سهلة ولا نفع الصراخ ولا بيدنما نسوي شي نردهن عنا وكل ذيب استلم له واحد من ربعي وبدا ياكل في راسه واذا خلص بدا يحفر له وياكل الباقي وانا كان من نصيبي اكبرهم واللي والله اعلم انه رئيسهم ولكنه ما كان مستعجل على اكلي فتمدد حولي وجلس يلعب في وليمته ومرى يحط يده على راسي ومره يتحكك بجسمة على وجهي وانا كنت مستسلم ولا اتحرك وافكر كيف ممكن انجو من هالمصيبة وبعد فترة من اللعب قرب وجهه من وجهي ويوم صارت اذنه قدام فمي جمعت كل قوتي في عضة وحده وعضيت اذنه بكل قوتي .. الذيب تفاجأ وسحب راسه بقوة ولكن انا كنت متعلق في اذنه ولا فكيتها ابد وهو منهبل ويتألم ويسحبني بكل قوته وهنا بدا جسمي يطلع شوي من الحفرة ولكني ما تركته لانه ممكن يغلبني وانا ما امداني اطلع وبدا يسحب ويسحب لييين طلعت وتركته وهو اللي ينحاش ويعوي من الوجع وانا وقفت ما ادري وشلون الله نجاني من الحفرة وهربت من هالمكان قبل لا يستوعب الذيابة اللي حصل وركضت ولا توقفت الا عند اول ديرة ونجاني الله من ذاك الموقف ..

مطلق توقف شوي .. ورفع نضره لسعود وعبدالرحمن اللي كانوا في قمة العجب من هالسالفة .. ثم نزل راسه وتكلم بنبرة صوت غير اللي قبل شوي .. من ذاك اليوم عرفت ان الله امد في عمري وعطاني فرصة عشان اصلح حياتي بعد ما شفت حياة اخوياي تروح وحده ورى الثانية .. عرفت اني لازم اتوب واكفر عن كل اللي سويته ومن ذاك اليوم اعلنتها توبه ولا عدت لذيك الافعال والحمد لله على نجاته وهدايته ..

جا دور عبد الرحمن وهو يقارن في باله بين سالفته وسالفة اخوياه اللي كل وحده اعجب من الثانية ثم تواسا وقال : الحمد لله على سلامتكم انتم الاثنين ولكن انا مر علي موقف حول مواقفكم ذي ويمكن اقوى بعد .. وهنا بدا بسالفته اللي بيحكي فيها اسوأ يوم مر عليه ..

قال عبدالرحمن : انا كنت في شبابي راعي بل وكنت اقضي معها اغلب وقتي ومستانس ومحصل من وراهن خير .. لكن حصل لي موقف خلاني اترك البل واكره البعارين كلها ..

استغرب مطلق وقال : وش صار والله ان البل لها عشق واخبرهم ما يقدرون يخلونها وش ما صار ..

قال عبدالرحمن : لو صار لهم مثل سالفتي كان يخلونها مثل ما خلييتها وهي كانت اغلى شي عندي في الدنيا ,,

قال سعود بحماس : وش صار يا رجال تراك شوقتنا ..

قال عبدالرحمن : انا الله يسلمكم

مطلق وسعود : سلمت

عبدالرحمن : انا كان عندي زي ما قلت لكم ابل وكنت عايش حياتي في تربيتها وكنت احب اقضي معها اكثر وقتي تسليني واسترزق منها .ز وكان عندي فحل هايج ما يرده شي واي ناقة يبيها ما نقدر نمنعه عنها وذاك اليوم حط في بالة ناقة صغيرة توها وكنت ابعدها عنه قد ما اقدر ولكن ذاك اليوم لقيته جايها وعاضها مع رقبتها وخفت عليها تموت منه وانا اركض لهم واضربه مع رقبته بعصا معي وتركها من الوجع ورجع عنها وانااسحبها وابعدها عنه واعزلها لكني حسيت انه يناظرني نظرات كلها حقد وعرفت انه ناوي نية شينة لي .. وصرت احذر منه ودايم عيني عليه لايغدر بي .

بعد كم يوم كنت جالس ازين غداي ولهيت عنه وما حسيت الا بالارض ترجف والتفت الا هذا هو جايني بكل سرعته من بعيد وانا انقز واركض بكل ما عطاني الله من سرعه وحسيت انه بيلحقني واشوف ذيك الشجرة اللي قدامي وانحرها وانا اركض واشيل عني عباتي وارميها على الشجرة وازحف من تحتها وابعدت عنها وصار الفحل يضرب ذا الشجرة ويحسب اني وسط العباة وانا يوم شفته لاهي قمت على حيللي وركضت جهت الجبل ولكنه حس فيني والتفت علي وشافني وترك الشجرة وصار يركض وراي وانا اسرعت ولا اضني وفرت جهد ذاك اليوم .. ووصلت الجبل ولا يمديني ارقاه من هالجهة ولا يمدي الف من وراه وانتبهت الا فيه ذاك الغار الصغيير وانحره وادخل فيه و الفحل وراي على طول ودخل راسة وراي وكان بيني وبينه مسافة قريبة وخلاص كان بيعضني لكنه توقف لان جسمه نشب وصرات الفتحة اصغر من انها تسمح له بالدخول ..

انا حمدت الله ودخلت في ذا الغار زود عشان ابعد عنه وهو يحرك راسه في الغار ويرغي باعلى صوته المخيف والزبد يتطاير في المكان مع حركىة راسه .. وانا في طريقي انتبهت الا وذيك الداب ( الحية ) اللي وش كبرها نايمة .. وخفت اقرب وتقوم تلدغني وعرفت اني افتكيت من شر وطحت في شر اكبر منه ..

عبدالرحمن رمى نظره على سعود ومطلق ولقاهم في قمة الحماس للاستماع وجالسين وكنهم مهوب على الارض .. هنا حس ان سالفته صارت مثل سوالفهم ولا اقوى بعد ..

كمل عبدالرحمن : انا صرت بين وحشين بعير هايج ويبي يذبحني وبين حية لو قامت تبي تحسبني جاي اذبحها وتبي تقتلني بدون تردد . وطرت لي فكرة اني انزوي في مكان ضيق في هالغاار واحاول اختبي عن هالمصيبتين لين الله يفرجها من عنده ..

صوت البعير القوي كان كفيل انه يزعج الحية ويشعرها بالتهديد وراحت له وشافته مدخل راسه في الغار ونطت عليه وغرست انيابها في رقبته وهو اللي يسحب رقبته والحية اللي متعلقة فيها ويبدا يضرب فيها الارض وهي كان ملتفة عليها وصار يخبط بجسمه ويضرب الحجارة وبينهم الحية لييين ماتت طاحت الحية في الارض وبدا البعير يقطعها تقطيع وبعد ما خلص منها كان بيكمل مهمته الانتقامية ويرجع لعبدالرحمن لكن السم صار قد اخذ مجراه في جسم البعير وبدا التأثير وطاح جنب الحية ميت ..

يقول عبدالرحمن : طلعت ولقيت الداب والبعير ميتين وفهمت وش اللي صار لهم وحمدت الله الي نجاني منهم بلطفه وتدبيره وقررت اني اترك البل كلها واشتغل في عمل ثاني والله الرازق ..

وصارت ليلة الثلاثة من اجمل الليالي وسبب في قربهم لبعض وكملوا رحلتهم وكلن خلص حاجته .. وحنا خلصنا سالفتنا

والحمد لله رب العالمين

سبحونة الشيخ الفيلسوف

2011-01-03T13:51:00.000+03:00

سبحونة الشيخ الفيلسوف

بسم الله

كان في هاك الواحد والواحد الله في سماه العالي

كان هناك واحد اسمه عبدالمحسن وعبدالمحسن شاب متعلم ومثقف ويحب الاطلاع كل ما حصلت له الفرصة و تمكن من العلم لدرجة انه الناس في ديرته يسمونه الشيخ عبدالمحسن ,,

عاش الشيخ عبدالمحسن في طلب العلم والمعرفة وانشغل عن الحياة العادية اللي يعيشها الناس عادة .. اقصد انه ما فكر في الزواج لانشغاله بالكتب وما تحوية من معلومات ما يقدر مقاومتها .. الا انه في الاخير يرجع الى انه محتاج الى زوجه صالحة يعيش معها هالحياة اللي ماتكون كاملة الا بوجودها ..

عبدالمحسن في شبابه تلقى الكثير من العروض وكلن كان يبي يخطبه لبنته الا انه كان مصر انه ما يتزوج الا فتاة هو مقتنع فيها وخاصة مقتنع بتفكيرها و تقدر تجاريه وتجاري افكاره والا فهو بيرفض الزواج ..

عاش عبدالمحسن وحيد بعد ما توفى والديه و قرر انه يترك ديرته لانه ما لقى البنت اللي يحلم فيها وخذ على نفسة العهد انه يبحث عنها ولا يتنازل عن مواصفاته اللي وضعها ..

وصارت حياة عبدالمحسن تجمع بين طلب العلم والبحث عن الفتاة والتنقل بين البلدان .. وعلى هذا سارت حياته سنه بعد سنه وعبدالمحسن يفقد شبابه مع مرور الوقت لكن هذا ايضا ما خلاه يتنازل عن اللي في باله ولو عاش وحيد طول حياته ..

مرة كان عبدالمحسن يتجهز للانتقال من الديرة اللي هو فبها الحين و قرر يودع المكان بركعتين يشكر الله فيها على نعمه ويطلب ان الله يرزقه ببنت الحلال اللي يبحث عنها .

يارب ارزقني بنت الحلال اللي تفهمني وافهمها وتسعدني واسعدها و تعينني على الخير ..

وترك عبدالمحسن المكان وقلبه متعلق بدعواته ولما خرج من بيته للمرة الاخيرة رفع راسه لللسما ء وكانه يتابع دعواته وهي تصعد لرب العالمين

تنهت عبدالمحسن وتوكل على ربه واغلق الباب وسلم المفتاح لراعي البيت الجديد وقال له الله يبارك له يابو محمد في البيت واعذرنا على القصور ان كانك شفت شي مني ..

رد ابو محمد والله يا عبدالمحسن ما شفنا منك الا كل خير وودا انك جالس معنا ومناسبنا ما راح نلقى ازين منك ..

ابتسم عبدالمحسن وكان الكلمة لامست شي في خاطره وربت على كتب ابو محمد وقال : فمان الله وحللنا وانت بحل

ركب عبدالمحسن على ناقته المحمله ببعض الاغراض فراش وحصير وسراجين وبعض الغريضات الثانية وكان جزء كبير من حمولته هي كتب ما قراها وناوي يكملها في منزله الجديد ..

في الطريق كان متوجه شمال وماسك جادة الطريق متوكل على ربه و ونيته تجمع بين طلب العلم والبحث عن شريكة حياته ..

وبعد ما مشى له نص يوم وهو يوقف يرتاح شوي ويصلي وهو يشوف رجال معه ناقته ومقبل من بعيد .. عبدالمحسن فرح بشوفة هالرجال وحسب حسابه في القهوة لعله يسولف معه ويسليه شوي ..

وصل الرجال وكان شايب في الخمسين تقريبا واسمه ابو حاتم ومع ان عبدالمحسن كان في نهايات الثلاثين الا ان حكمته ورزانته تخليه يبدوا اكبر بكثير على الاقل اذا تحدث ..

بعد السلام والسوالف الخفيفيه عرف عبدالمحسن ان هالشايب من الديرة اللي يبي يروح لها عبدالمحسن وهذا خلى عبدالمحسن يعرض على الشايب انهم يتخاوون في الطريق .. والشايب فرح بهالاقتراح وقال والله نعم الراي ونعم الرفيق ياولدي .. والله اني ارتحت لك واعجبني منطقك اللي يدل على رجاحة عقلك ..

ابتسم عبدالمحسن ابتسامة لطيفة ورد : الخير فيك ياعم ابوحاتم وانا اللي ربحان برفقتك .. وبعد هالمجاملات اللطيفة استعدوا للرحيل ..

مشى الرجلان فترة وكان الهدوء يعم المكان ولا تسمع الا قرقعة الغريضات الي يحملانها ..

هنا عبدالمحسن حب يكسر الهدوء وقال للرجال وش رايك يابو حاتم اشيلك ولا تشيلني ؟؟

ابو حاتم ما قدر يستوعب وش قال عبدالمحسن ولا قدر يفهم وش المقصود .. كل واحد ومعه ناقته ولا يحتاج من يحمله ؟؟ ولان ما عنده جواب سوا نفسه ما سمع .. وعبدالمحسن فهم انه ما فهم ..

بدا عبدالمحسن يسولف وابوحاتم يشاركه بالسوالف .. الين شاف عبدالمحسن مزرعه والتفت على ابو حاتم وقال له وش رايك يابوحاتم هالمزرعة اكلوها اهلها ولا توهم ؟؟

ابوحاتم ما استوعب السؤال !! كيف كلوها وهي توها ما بعد حصدت والوقت توه على الحصاد ؟؟ !!

قال والله مدري ياولدي ..

عبدالمحسن ايضا فهم ان ابوحاتم ما فهم المقصود ولكنه مثل ما فعل مع السؤال الاول ما فسر مقصوده وكمل المسير ..

وبعد سويعات مر عبدالمحسن وابو حاتم من ديرة صغيرة وشاف عبدالمحسن اهلها طالعين بجنازة شايلينها على كتوفهم ..

قال الشايب :الله يغفر له ويرحمه ويرحم اموات المسلمين ..

رد عبدالمحسن : الله يرحمه بس ياعم ابوحاتم هقوتك هالرجال حي ولا ميت ؟؟!!

ابوحاتم واللي مافهم السؤالين اللي قبل وسكت ما قدر يسكت على هالسؤال اللي هو الاغرب !!

قال : وشلون ياولدي ما مات وهو مشيول الحين ومودينه لقبره !!

سكت عبدالمحسن ولا فسر قصده وقال : صدقت واردفها ابتسامته المعتاده ..

استمرت الرحلة ووصل عبدالمحسن وابوحاتم الديرة في الليل وسأل ابوحاتم عبدالمحسن انه يقلط عنده وينام هالليلة على الاقل ولكن عبدالمحسن متعود على الوضع وقال الله يسلمك يابو حاتم انا ابروح لاعلى مكان في ديرتكم وابرقد فيه .. انت ما قصرت و بيض الله وجهك

ابوحاتم كان وده يلزم على عبدالمحسن ولكن فيه شي اشغل باله اكثر وشلون عبدالمحسن يقول ابرقد في اعلى مكان في ديرتكم وديرتنا لا فيها جبال ولا تلال ولا مرتفعات ..

ابو حاتم صار عنده صورة مشتته عن عبدالمحسن اول شي شاف فيه الرجال العاقل المتعلم ولكن الاسئلة الثلاثة كانت بلا معنى وغريب واحد زي عبدالمحسن يسأل مثلها !!

افترق الاثنين بعد ما ودع كل واحد منهم الثاني على امل اللقاء في الغد بعد راحة من تعب الطريق ..

دخل ابوحاتم بيته وكانت بنته تنتظره بشوق ورحبت بابوها وقبلت راسه وضمته بشوق واخذت وقت وهي تهلي وترحب بابوها بعد رحلته ..

وجهزت لابوها العشا وكان البيت مرتب وعلى احسن حال و غرفته نظيفه مبخره وجاهزة عشان يتمدد فيها ولكنه يحب بنته الوحيدة واللي بعد فقد امها كان هو ابوها وامها وصديقها ..

نجلا بنت ابوحاتم كانت ذكية ومتعلمة و تحب الاطلاع والقراءة ومع انها تزوجت من ولد عمها لكن الفرق الثقافي بينهم سبب في انفصالهم فهو ما كان يقدر يجاريها .. وانزعج من كونها تعرف اكثر منه .. فطلقها

ابوحاتم كان قاعد يستمتع بوجبته اللذيذة من طبخ نجلا بنته وكم كان مشتاق لها ولسواليفها ولطبخها اللذيذ وبدا يكلمها عن رحلته كالعادة اذا جاء من سفر بس هالمرة كان في سوالفه علامات استفهام ناتجة من اسالة عبد المحسن ..

يقول ابوحاتم : صادفت يابنتي رجال غريب .. وترافنا في الطريق ..

نجلا : وشلون غريب يبه .. ؟؟

ابوحاتم : سواليفه غريبة اول ما جلست معه لقيت فيه الرجال العاقل المثقف اللي ما ودك يسكت ويعرف كل شي ..

نجلا : طيب يبه وش الغريب للحين ما فهمت ..

ابوحاتم : الغريب يابنتي انه يوم مشينا جايين للديرة بعد ما اتفقنا تنخاوى سألني اسألة غريبة ؟؟ ولا فهمتها مدري انا مفهمتها ولا هو ما يفهم ..

نجلا مستغربه : هو!! وش الاسألة يبه مثل ايش يعني ؟

ابوحاتم : اول ما مشينا سألني قال اشيلك ولا تشيلني !! وحنا كل واحد فوق نافته فوشوله يقول اشيلك ولا تشيلني ؟؟

نجلا تعدلت جلستها وارتسمت في عينها نظرة غريبة .. : طيب يبه كمل كمل ..

قال : انا ما رديت عليه كني ما سمعت السؤال ولكن بعد فترة مرينا جنب مزرعه وعاد تخيلي وش قال ؟؟

نجلا بحماس : وش قال يبه ؟؟

ابوحاتم : يقول تهقا "تتوقع " اهل هالمزرعه كلوها ولا لا والمزرعه توها ماا حصدت ولا حول حصاد ؟؟

نجلا : وش بعد يبه في شي ثاني قاله ؟؟

قال: ايه مرينا جنب ديرة ونشوف ذيك الجنازة وهو اللي يسألني هالرجال حي ولا ميت ؟!؟!

نجلا وهي تضحك ضحكه بسيطة : ووش جاوبته يبه ؟

قال ابوحاتم : انا والله ما قدرت اسكت وقلت منتب تشوفه مشيول للمقبره؟؟ اكيد ميت ..

ضحكت نجلا من جواب ابوها وبعد ما خلصت قالت يبه تبي اعلمك وش كان يقصد ؟

ابو حاتم : وانت فهمتي يابنتي شي غير اللي انا فهمته ؟

نجلا : ايه يبه هذي اسألة صحيحه ولها معنى بس انت يبه ما فهمت هو وش يقصد بس ..

مسح ابوحاتم يديه ورغم تعبه الا ان كلام نجلا خلاه ينشط شوي ويتواسا في جلسته ويركز في وجه بنيته ويقول .. علميني وش قصده تراني يابنيتي والله محتار من هالرجال واني احسبه صار خبل عقب ما كان عاقل ..

ابتسمت نجلا وقالت ابشر يبه ابعلمك ..

السؤال الاول واللي قال لك اشيلك ولا تشيلني كان يقصد اسولف عليك ولا تسولف علي لان السوالف في السفر تقطع الطريق وتخليه يروح بسرعه وكن اللي يسولف عليك يشيلك في هالوقت ,,

ابوحاتم مندهش من التفسير اللي ما خطر على باله .. ويستمع بتركيز اكثر ..

كملت نجلا : والسؤال الثاني حق المزرعه يقصد يوم يقول اهلها كلوها ولا لا ..

يقصد ان راعي المزرعه متدين دراهم الزراعه هالسنة واكل الدراهم قبل يزرع ولا ما تدين فيصير الحصاد له ويخزنه وياكل منه ..

ابوحاتم يحك راسه ومستغرب اكثر

نجلا تستطرد .. والاسؤال الخير اللي قاله يوم شاف الميت هو حي ولا لا ؟ هذا يقصد هو له عيال يحييون اسمه ولا لا فيصير مات ذكره من الارض ..

ابو حاتم بعد ما بانت له الصورة بعد تفسير نجلا الاسأله له ببساطة رجعت صورة عبدالمحسن الاولى وانه شاب ذكي ومثقف وان اسالته تدل على ذكاء كبير ونفس الوقت زاد اعجاب وفخر ببنته نجلا والي عرفت معنى اسالة عبدالمحسن الغامضة ..

بعد هالسوالف راح ابوحاتم ينام .. ومسته بالخير بنته وراحت ترقد بعد ولكنها كانت تفكر براعي هالاسالة الغريبة وكيف يكون هالشخص ووش شكله وش يفكر فيه يوم يسأل ابوي هالاسألة ؟؟ واستمرت تفكر لين غلبها النوم ..

في الصباح قامت نجلا على صوت ابوها وهو يطحن القهوة ويجهز المعاميل كعادته كل صباح وبعد ما قامت ولبست وصلت جت تسلم على ابوها ووجلست معه تشرب من قهوته اللي فقدتها الايام الماضية وبدت تسولف سواليف بعيدة عن راعي الأسألة ولكنها تلف وتدور تبي ابوها يجيب طاريه من جديد لانها ودا تتعرف اكثر عليه وعلى شخصيته ..

ابوها فعلا جاب طاريه وقال والله يابنتي ان هالرجال اللي خاواني امس ودي اعزمه على العشا ولا الغدا باتسر ..

قالت بنته والله يبه اكرام الضيف واجب وهي فرحانه انه بيدخل بيتهم بس في داخلها وما اظهرت هالشي ..

ولكن علامات الاستغراب اللي شافتها نجلا في وجه ابوها بالامس عادت على وجهه وهو غارق في التفكير ..

بادرته نجلا بالسؤال : وش فيك يبه وين رحت بتفكيرك ..

ابو حاتم : والله يابنتي ان هالرجال غريب ؟

نجلا : كيف يبه .؟

ابو حاتم : حنا قبل نفترق عزمته يجي يمرح عندي بس انه قال انه يبي يتوجه لاعلى مكان في الديرة وينام فيه وحنا تعرفين ديرتنا منبسطة ما فيها مرتفعات ابد والحين لو ابي اعزمه واكرمه منيب عارف وين اروح ..

نجلا ارتاحت كثير وقالت : يبه رح للجامع الكبير تبي تلقاه هناك .

ابوحاتم : وش عرفك يابنتي ؟

نجلا : يبه هو يوم يقول اعلى مكان وارفع مكان يقصد بالقدر والمكانة وارفع مكان في الديرة هو المسجد بيت الله واذا رحت تبي تلقاه هناك اكيد ..

استغرب ابوحاتم من نعرفة بنته للامر بهالسهولة وهو ماكن مستوعب أي شي ..

وبعد ما افطر ابوحاتم طلع من البيت وتوجه للجامع الكبير واللي كان في طرف الديرة وكان عبدالمحسن هناك متكي على عمود في الجامع ويقرا له كتاب وما درى الا وابو حاتم فوق راسه ..

قام ولم عليه واستغرب قال وشولن عرفت مكاني بهالسرعه ؟؟

قال ابو حاتم لانك قلت ابي اروح ارفع مكان ولا عندنا ارفع من الجامع مكانه في هالديرة ..

عبدالمحسن استغرب من هالاجابة الذكية مع ان ابوحاتم ما بان منه أي بادرة تؤهله انه يجاوب على هاللغز في المرة الاولى ..

وبعد سواليف علم ابوحاتم عبدالمحسن الاجابة على كل اسألته وانه فهمها كلها وان اللي فسرها له بنته نجلا ..

وعزم ابوحاتم عبد المحسن على الغدا .. ووافق عبدالمحسن بسهولة فهو وده يشوف هالبنت الذكية اللي فهمت اسالته بكل بساطة وفكر جديا انها تكون هي اللي يدور عليها كل هالسنين لكنه قال لا تستعجل ياعبدالمحسن ممكن تكون فيها عيوب مع ذاكائها همن تصير مثل اللي صام وافطر على بصل .. لازم اتأكد من شكلها و خلقها ..

ولما جا وقت الغدا جا عبدالمحسن لبيت ابوحاتم ودخله وهو يشوف البيت مرتب ونظيف وعلى احسن حال وبعد ماعرف ان ابوحاتم ماعنده زوجه ولا في البيت امرأة الا بنته نجلا .. دخلت قلبه اكثر وبغى يطلب يدها لكنه بعد صبر نفسه وقال نشوف فعلها في الطبخ ..

وبعد سوالف في المجلس طلع ابوحاتم من المجلس ورجع وهو يهلي بضيفه ويدعوه لتناول الغدا .. ياهلا يا هلا اقلط حياك الله على قل الكلافة ..

ودخل عبدالمحسن وشاف ما يسره من ترتيب الاكل واستانس اكثر لما ذاق طعمه وعرف ان هالبنت تمتلك مواصفات رائعه غير الذكاء ومع هذا قرر يصبر لين يتأكد من شكلها لا تصير مشوهه ولا بشعه لدرجة انه ما يقدر يعيش معها .. وقرر يتصبر ويكون حكيم

وبعد هالوليمة اللذيذة من يدين نجلا ودع عبدالمحسن ابوحاتم وشكره على حسن الضيافة وخرج وهو ناوي يشوف طريقه عشان يتأكد من شكل البنت قبل يتقدم لخطبتها خاصة ان عبدالمحسن يعرف ان اهل هالديرة ما يسمحون للرجال يشوف زوجته الا بعد الزواج هذا عرفهم ..

تذكر عبدالمحسن ان له صديق يسكن في هالديرة وراح لبيته وسلم عليه وشرح له كل التفاصيل اللي صارت وطلب منه انه يخلي زوجته تروح تشوفها وتوصفها له ..

راحت الزوجه لبيت ابوحاتم ونفذت خطة عبدالمحسن .. بعد ما تأكدت ان ابوحاتم طلع راحت وطقت الباب ولما فتحت نجلا الباب قالت المرة والله انا ادور بيت الفلان واني ضيعت بيتهم ..

اعتذرت نجلا بادب وقالت والله منيب اعرفهم ولا اقدر اساعدك بس تفضلي تقهوي وارتاحي وبعدها كملي مشوارك ..

دخلت زوجة صديق عبدالمحسن واعجبتها البنت باخلاقها وطيبتها وسوالفها اللي تدل على رجاحة عقلها ثم ودعتها وطلعت ..

في هالوقت كان عبدالمحسن على احر من الجمر وهو ينتظر النتيجة والاخبار اللي تحملها زوجة صديقه ..

ولما وصلت البيت نقل صديق عبدالمحسن الاخبار من زوجته وقال زوجتي تمدحها واخلاقها وعقلها لكن الشكل تقول مهيب جميلة .. يعني هي من البنات الوسط ..

هنا عبدالمحسن فكر بالموضوع وقعد يحسب حساباته وهل بيكمل عهده للبحث عن الفتاة الكاملة ولا ببيتنازل ..

وفكر وفكر ولقى ان الجمال الخارجي يروح مع الوقت والواحد بعد ما يتعود على زوجته الجميلة مع الوقت ما يشوف هالجمال ويبقى له الجمال الداخلي والسنع والاخلاق .. وهذي كلها صفات تتحلى فيها نجلا .. و قررفي النهاية انه يتقدم لخطبتها ..

وهذا اللي صار وتقدم عبدالمحسن لابوحاتم وطلب يد بنته وبعد ما شاور ابوحاتم بنته وشاف منها الموافقة وان كانت ما صرحت بهالشي ..

وكتب الله ان يجتمع عبدالمحسن وبرفيقة دربة نجلا بعد طول انتظار

وعاشوا في سبات ونبات وجابو صبيان وبنات

والحمد لله

سبحونة بنت صالح والترنجه

2010-12-15T23:15:00.000+03:00

بسم الله

كان فيه هاك الواحد والواحد الله في سماه العالي والى هناك هاك الرجال اللي اسمه صالح واللي متزوج مرةِ يقال لها حصة وهي بقت معه سنين لكن ما جاب الله بينهم عيال وكانت حصة تعتقد ان العقم منها هي وصالح كان ساكت على شوقه للولد ورغبته الا انه صابر ومحتسب ولا جاب طاري العيال لمرته ابد عشان ما يكدر خاطرها وحصة كانت ازود منه شوق للعيال وكانت تدور على علاج بكل طريقة تقدر عليها ..

وبعد تجارب من هالاعشاب والخلطات حصة ما يأست وكانت للحيين تدور على علاج لعقمها و مره كانت عند خويتها وكان عندها ضيوف جايين من ديره بعيدة ويسولفون وجابوا طاري العقم وقالت حصة انا والله ما خليت شي ما جربته وكل من قال ابجي من ديره بعيدة ولا قريبه وصيته يمر على عطارهم ويطلب منه وصفة للعقم وانا اجربها لكن ما كتب الله شي ..

هنا الضيفة اللي كانت عند خويتها استغربت وقالت انا جايه كل هالمسافات عشان واحد يذكر انه بيمر ديرتكم باتسر ويبي يعالج الناس كم يوم قبل لا يكمل طريقه وتراه طبيب معروف وشاطر وباذن الله علاجك عنده ..

استغربت حصة انها ما سمعت بالخبر وعقدت العزم انها تبي تشوف هالطبيب وتستغل جيته لديرتهم لعل الله يوفقها ويرزقها بالولد اللي تحلم فيه ..

جا الخبر من حدى الصبيان ان الطبيب وصل الديرة وطلعت حصة من بيتها ومعها دراهم جامعتهن للحاجة وقالت ما ورى طلب العيال حاجة عندي الحين وراحت للطبيب وكان زوجها صالح في شغله ..

الطبيب وصف لها علاج يبي يسقيه في ترنجه ويبي يعطيها اياها تاكلها قبل النوم بثلاث ساعات وتبي تكون هي سبب بعد الله في حملها ..

حصة بسبب حاجتها وشفقتها الكبيرة على العيال كانت مستعدة تصدق أي شي وتجرب أي شي فدفعت كل الدراهم على هالترنجه اللي ما تسوى عشر المبلغ المدفوع بس لانها مسقية بهالتركيبة رضت حصة تقدم الغالي في سبيل حلمها ..

رجعت حصة البيت بسرعه لان وقت الغداء قرب وصالح جاي في الطريق ولا تبيه يعرف انها شرت ترنجه بكل الدراهم اللي معها فيزعل ويتكدر ويمكن يهاوشها بعد .. ولان ما عندها وقت تجرب الترنجه ولا توزيها في مكان حطتها في مجلس الرجال ورى الباب وراحت للمطبخ .

دخل صالح البيت وهو ذابحه الجوع وكان متعود يلقى الاكل جاهز بس هالمرة دخل الا وحصة توها تطبخ

قال لها ما زهب الغداء

قالت بس دقايق انت تريح شوي و انا ازهبه لك هالحين ..

صالح راح يبي يريح ويتمدد شوي وهو يروح للمجلس عشان يتمدد هناك على المساند ويوم جلس وهو يشوف الترنجه محطوطه ورى الباب وما قدر يقاوم شكلها .. وهو اللي يلقطها ويقشرها وياكل لبها ويلحقه بقشورها اللذيذة ..

ويوم زهب الغدا دخلت حصة المجلس عشان تنادي صالح وهي اللي تنهبل يوم شافت بقايا الترنجه جنب صالح وما بقى منها شي وبدت تصيح وتولول ..

صالح : وش فيتس عسى ما شر ..

قالت : الترنجه من كل الترنجه ..

قال : انا ولا تخافين ابجيب لتس بدالها عشر بس اذكري الله واسكتي

هنا حصة ما ملكت نقسها وقالت لصالح وش السالفة وليه كل الازعاج عشان الترنجه ..

صالح تندم على العجله وتاسف لحصة وقال معوضة ان شاء الله واللي كاتبه الله هو اللي يصير ..

مرت الايام وصالح بدا يشتكي من وجع في رجله وكل يوم يزييد الوجع شوي لكنه كان يتصبر وهو يضنه من تعب الشغل

وبعد كم شهر صارت الاوجاع اكبر و بدا فخذ ناصر يتورم بشكل كبير وتصبر صالح وحاول يكمدها ويحط عليها علاجات شعبية لكن ما فادت ,.. وفي ليلة قامت رجل صالح تصول عليه ولا قدر ينام ويسحب روحه لبيت ولد عمه ويطلب منه انه يساعده وولد عمه على طووول وداه للمستشفى القريب اللي في الديرة المجاورة وهناك سووا فحوصات على الورم اللي في رجل صالح وتعجبوا من اللي شافوا

وجا الطبيب لصالح وقال له ترا اللي في رجل شي عجيب لكنه حقيقه والله اعلم كيف صار ..

خاف صالح وقال خير يا طبيب وش لقيتوا

قال الطبيب لقينا في فخذك جنين ولازم نطلعه الحين قبل يموت وبنسوي لك عملية الليلة ..

صالح ما قدر يستوعب السالفة وضاقت عليه الدنيا وكان ولد عمه يهونها عليه ويشجعه يوافق يسوون العملية وبعدها يحلها ربك ..

استخرج الاطباء الجنين واللي كان بنت وكان في صحه وبعد ما حطوه في الحاضنة كم اسبوع زانت صحتها وصارت بنية وش ملحها ..

لكن صالح بعد ما طلع من المستشفى قال لولد عمه شف ترا هالبنت ما ابيها تطب علي البيت ما نبي العالم يحطوننا طنازة وخل المستشفى يتصرفون فيها ..

ولد عمه حاول يقنعه وقال هذي بنت صغيرة ولا لها ذنب حرام تجدعها كذا .. الا ان صالح كان مصر على موقفه وراح ولد عمه يحاول في حصة ويقولها يابنت الحلال هذي بنية مالها احد في هالدنيا ولكن حصة كانت اشد من رجلها صالح وقالت ان جبتوها البيت طلعت انا .

هنا عرف ولد عم صالح ان مصير البنت مهوب في بيت اهلها ولما راح للمستشفى يبلغهم قالوا ما عندنا هالكلام ولازم البنت ترجع بيت اهلها ولا ترا نبي نبلغ الشرطة يتفاهمون معكم ..

ما كان قدام ولد عم صالح الا حل وحيد ..

اخذ البنت وراح بها للصحراء ونزل في وادي في شجر وحطها في عش طير في هالشجرة وقال اللي كاتبه الله بيصير والله يعفوا عني ...

مرت الايام ورجعت الحياة في بيت صالح كما كانت وكان هالبنت ما جت للدنيا اصلا .. لكن ولد عم صالح كان ما يقدر ينام ولا يدري وش صار في البنت هي حية ولا ميته .. وما قدر يصبر ..

بعد كم اسبوع راح لنفس المكان وبدا يبحت عن اثر البنت بيشوف حالها ويتفاجئ بان الطيور يوم لقت البنت في عشها حسبتها وحده من عيالها واعتنت فيها .. وتعجب ولد عم صالح وقال لو عرف صالح ان هالبنت عايشة للحين يمكن يجي يتخلص منها ..

فقرر انه يخلي الموضوع سر ما يعرفه الا هو والطيور في هالوادي البعيد .. وصار يتردد على البنت كل فترة ويعطيها الاكل واللبس ويسولف معها وهي ما تعرف من هو ولا وش قصتها ..وليه هي عايشة هنا ..

ولما صارت في سن العشر سنين حس ولد عم صالح ان البنت لازم تعرف جزء من قصتها وقال لها سالفة الترنجه وكيف انها طلعت من فخذ رجال وهالرجال قرر يقتلها ويرميها في الصحراء بس ان الله سخر لك هالطيور تعتني فيك والله ما ينسى احد ..

وبدت تقل روحات ولد عم صالح للوادي بسبب تدهور صحته واللي سرعان ما اودت بحياته ومات معه سر البنت ولا صار احد من البشر يعرف عنها شي الان ..

مرت سنين والبنت تعيش مع اهلها الطيور واستوحشت البنت وصارت تجفل من البشر لو مرت قافلة توزت ولا تبي احد يشوفها ..

لكن في يوم من الايام كان هناك أمير شاب يحب الصيد وكان يطلع لاماكن ما احد سبقه لها عشان يضمن الصيد الوفير ويجرب الصيد في مكان ما قد طبه احد .. وفي رحلته الاخيرة وهو يتنقل في الوادي اللي فيه بنت صالح .. لمح الامير زول البنت من بعيد وهي نازلة من الشجرة ولكن يوم قرب يبي يشوفها اوضح حست فيه البنت وتنقز بكل رشاقه وتتسلق الشجرة وتتوزى عن الغريب اللي جا ..

الامير عرف وين هي فيه بس ما حب يخوفها او يحسسها انه خطر عليها فسوى نفسه ما انتبه لها ورجع لحاشيته وامرهم بالرجوع ولو انهم ما صادوا شي لانه كان يخطط على صيده الثمين اللي شافه قبل شوي ..

قعد الامير في قصره محتار كيف يقدر يوصل للبنت وكل ما تذكر شكلها ونظرت عيونها يشتاق لها اكثر .. وقرر انه يسوي خطة يقدر بها يجيب البنت عنده .. فنادى عجوز يعرفها بسعة الحيلة وانها ما تعجز عن شي .. وقال لها الخبر والمطلوب

قالت العجوز ابيك ترسلني هناك لحالي ومعي معاميل الطبخ وتيس حي واتركني ورح راقب من بعيد واذا اشرت لك تعال ..

العجوز صار لها اللي طلبت وصفت قدورها وشبت النار على الماء وبدت تجهز الطبخ ولكن يوم جت تبي تذبح التيس مسكت السكين بالمقلوب وكانت في مكان تقدر البنت تشوفها فيها .. وصارت العجوز تحلحل السكين في بطن التيس وهو يزاعق باعلى صوته والبنت سمعت الصوت وبدت تراقب العجوز وش تزين ..

ويوم لمحت العجوز حركة البنت في الشجرة تعجبت ان هالبنت تعيش هنا لكنها ما بينت شي وكملت خطتها وبدت تضغط على التيس اكثر وهو يرفع صوته اكثر والبنت تشوف وتراقب ..

وما صبرت البنت وصاحت في العجوز مهوب كذا يا خالة تراتس تعذبينه كذا ..

التفتت العجوز عليها وقالت يابنتي انا ما اعرف ذبح ولا عندي احد يساعدني وابي ازين لي شي اكله بس هالتيس ما عرفت له ..

البنت كانت حذره جدا من البشر وبدت تشرح للعجوز من فوق الشجره

ياخاله امسكي السكين كذا وحطيها على رقبته واسحبيها .. والعجوز تسمع التعليمات وتسوي شي ثاني والبنت تعبت من الشرح لهالعجوز اللي ما تفهم ..

قررت تنزل بس بعد ما تأكدت ان المكان ما فيه احد .. ونزلت وساعدت العجوز وذبحت التيس وقطعته وقامت تبي ترجع للشجرة لكن العجيز قالت لا يا بنيتي اصبري ساعديني في الطبخ وابيك تاكلين معي انا لحالي ..

البنت ما قدرت تقاوم فكرة الاكل خاصة بعد ما انقطع ولدعم ابوها عنها ولا تدري وش صار له فصارت من فترة طويلة ما ذاقت الاكل وعشان كذا قعدت وكلت وبدت تسولف مع العجوز واستامنت البنت وصار الوقت مناسب للامير انه يجي ويحصل على صيدته ..

اشارت العجوز للامير بدون لا تدري البنت و الامير ارسل عبد من عبيدة يمسكها وفعلا قدر يمسك يدها وهي اللي تخاف وتفزع وتحاول تهرب و لكنها تفاجأت الا ووجه الامير قدام وجهها وهو اللي يمسكها من زنودها ويوقلها بصوت هادي لاتخافين انا ما راح اضرك ولا اسوي لك شي ..

البنت هدت من كلام الامير وشكله الوسيم واستسلمت وكان العبد للان ممسك يدها لانه ما يضمن انها ما تهرب بعد شوي ..

راحت البنت للقصر وعاشت الدهشة والعجب في كل شي تشوفه كان كل شي غريب عليها وكل شي عبارة عن تجربة جديدة وبعد ما اخذوها وصيفات القصر و روشوها ولبسوها احسن الملابس كانت البنت من اجمل البنات اللي شافهم الامير في حياته وعرف انها صيدته اللي ما راح يصيد مثلها ابدا وعرف بعد ان هالصيدة عيي بعد صادته واسرته بجمالها وبراءتها ..

وبعد ما سمع الامير قصة البنت الغريبة العجيبة وكيف عاشت مع الطيور كل هالسنين .. عرض عليها الزواج وبالفعل وافقت وحضر القاضي ليكون ولي هالبنت اللي ما لها والي وتم الزواج وعاشت البنت في فرح وحياة سعيدة

اما الطيور فقد حزنت كثير على بنتهم واللي راحت بغير رجعه واكن عندهم امل كبير ترجع لهم ولكن بعد ما طالت المدة ما قدرت الطيور تصبر فارسلت في كل جهة واحد من اقوى الطيور ليبحث عنها وفعلا كان هذا حالهم وفي كل ليلة ترجع مقرها بعد رحلة بحث شاقة وكلهم يقص خبره للثاني ولكن ما احد منهم قدر يوصل للبنت ..

الا انه في يوم كانت البنت جالسة في شرفة القصر تتفرج على الحديقة وتطالع السماء و هي تشوف ذاك الطير اللي يحوم فوق القصر ولما عرفها الطير مع انها كانت لابسة غير وشكلها غير لكنها قدر يعرفها زين ,, قرب منها ونزل اكثر ولما تأكد انها اهي قرب الين وقف على سور الشرفة والبنت شافته وتذكرت اهلها الطيور وحنت لهم وبدت تسمح على ريش الطير وتحضنه باشتياق .. وبعدها تحرك الطير يبي يرجع لربعه في الوادي عشان يعلمهم الخبر وودعته البنت وحزنت لفراقه كانت على هالحال حزينة كئيبة ..

دخل الامير عليها وشاف الحزن والكأبة على حبيبته وخاف وسالها وش فيك ؟؟ فيه احد مسوي لك شي او مأذيك ؟؟

فيه شي تبينه ولا صار ؟؟

قالت لا كل شي في احسن حال بس انا تذكرت اهلي الطيور واشتقت لهم وحنيت .. وهم ارسلوا واحد منهم يدورني وشفته اليوم ..

تبسم الامير وقال .. بسيطة بكرا نطلع ونروح للوادي وتسلمين عليهم وتشوفينهم زي ما تحبينن .

فرحت البنت وبدت تجهز العدة لشوفتهم واخذت معها هدايا تناسب الطيور ولما جا الصباح ركبت هي فرس والامير فرس وانطلقوا للوادي و لما وصل الامير وزوجته كانت الطيور للان في طلب الرزق وقرر الامير انهم ينتظرون الى المساء وقت رجوع الطيور وهذا اللي صار ..

لما جت الطيور وشافت بنتهم في انتظارهم هبطت بجانبها والتمت عليها وبدت تمسحها بريشها وكانت البنت تبكي والطيور كانها تبكي ..

والامير تاثر بالموقف اللي شافه وكانه في الاحلام .. كيف العلاقة القوية بين هالطيور اللي ما تعقل وبين زوجته الغالية .. وقرر يفرحها واخبرها انه يبي ينقل الطيور عنده في القصر ويحط لهم شجر مثل شجر الوادي ويامن لهم اكلهم وشربهم شكر لهم على رعايتهم لك ..

طبعا فرحت البنت اللي اصبحت اميرة القصر وصار وقتها مقسم بين حبيبها الامير وبين اهلها الطيور وعاشت في سبات ونبات وخلفت صبيان وبنات ..

سبحونة عفارم افندم

2010-12-14T11:16:00.000+03:00

كان فيه واحد والواحد الله في سماه العالي والى هناك هاك الواحد اللي اسمه مبارك رجال من نجد متزوج وعنده عيال

وكان يسوي كل اللي يقدر عليه عشان يأمن لهم اكلهم وشربهم وحاجاتهم ولكن الاحوال في نجد كانت عصيبة والرزق ضيق فما لقى الا انه يسافر ويدور رزقه في ديرة ثانية لعل الله يسرها ويفرجها من عنده .

ولان زوجته تعرف الحال فما قدرت تمنع زوجها انه يروح و يبتعد عنها وعيالها عشان كذا شافت انها تشجعه على السفر ..

الرجال جمع كل الدراهم اللي عنده وعطاها عيالة وودعهم وقال انا ابروح لحاجة وانا مدري ابطي عليكم ولا اجي بسرعة انا ابحاول اللي اقدر عليه اني اعجل بالرجعه والله ييسر الامور ..

ودع الرجال اهله وسط دموعهم والحزن اللي يشوفه و واضح في وجه عياله وزوجته بس الحاجة خلته يفارقهم على أمل انه يرجع لهم بحال افضل ..

كانت وجهة مبارك يم الغرب وقال في نفسة ابمشي على الوجهة لعلي القى في الحجاز رزقي وان وصلت مكه على قوت الحج فأنا ابحج داميني وصلت و هذا اللي صار حيث وصل على قبالة الحج و أدى فريضة الحج ودعا ربه انه يرزقه من غير ما يحتسب و بعد الحج دور شغل في مكه ولكنها كانت غير مناسبة للطلب الرزق و قال اجل اتوجه لجدة و اكيد بوجود المينا والسفن ابشتغل لو حمّالي ..

وصل مبارك جده وهو في حال يرثى لها فالفلوس اللي معه خلصت ولا يعرف احد في الحجاز و ما قدامه الا يشتغل عشان يلقى قوت يومه وثم يفكر كيف يوفر قوت لعياله .. وبدا يبحث عن شغل في كل مكان وينشد كل رب عمل عشان يشتغل عنده وكلن كان يرده .. فالحال في الحجاز ليست بعيدة عن نجد ..

بعد ما قرب اليأس يدخل قلب مبارك الا ويشوف على جال البحر عمال يشتغلون .. وهذا بالنسبة لمبارك يعني الفرج لانها فرصة لوجود عمل .. ولا ضيع وقت قرب للمكان ويشوف ذالعمال يشتغلون يشيلون حصى كبير وينقلونه من الارض ويحطونه على الشاطيء وكان فيه رجال حوله حاشية وعرف ان هذا هو الحاكم للبلد من لبسه المنمق والحاشية الكبيرة اللي حوله وكان يراقب العمال من مكان مرتفع و يراقب .. هنا مبارك عرف انه لو كسب اعجاب هالشخص بيلقى الاجر اللي يبيه واكثر يمكن .. وبدون لا يستأذن شمر مبارك عن ثوبه و تناسى الجوع والتعب و بدا بالشغل ..

مبارك لرغبته الشديدة بالعمل كان انشط العمال الموجودين واللي كانوا بعكسه يشتغلون بتباطؤ ولكن مبارك كان يشيل اكبر حجر يقدر يشيله .. واذا ما لقى حصاة كبيرة شال ثنتين .. وكان يلحض الحاكم وهو يراقبه ويبتسم ويقول في نفسه ضمنا الدراهم ان شاء الله

وابشد حيلي عشان يزيد لي في الاجر ..

واستمر في الشغل الييييييين غابت الشمس وتوقف العمال ووقف مبارك معهم و تولم للدراهم ..

بعد شوي وبطريقه اوتوماتيكيه صف العمال قدام الحاكم وكان كل واحد يوقف قدامه شوي ويروح وهذا بنظر مبارك ان كل واحد يستلم دراهمه ويمشي .. صف معهم وهو يفكر وش بيسوي بالدراهم اللي بتجيه وينتظر في الصف مع العمال ويوم قرب من الحاكم شاف انه كل واحد يوقف قدامه يقول له الحاكم بعد ما يرسم ابتسامة عريضة كان يقول عفارم افندم .. واذا العامل اشتغل اكثر يقول له عفارم افندم عفارم افندم مرتين .. واذا هو مبدع مره قال له عفارم افندم عفارم افندم عفارم افندم ثلاث مرات وهذا اكثر شي ..

وما يزال مبارك في الصف ووصله الدور ويقول له الحاكم بعد طبعا الابتسامه العريضة .. عفارم افندم عفارم افندم عفارم افندم .. و انتظر مبارك لعل يجي شي بعدها ما لقى شي .. التفت وراح لمكان فيه العمال جالسين يرتاحون بعد التعب وسألهم الحين يالربع متى ناخذ كروتنا وتجينا الدراهم .. قال له واحد منهم انت اخذت حقت وافي ..

مبارك استغرب وقال انا ما اخذت شي والله .. رد عليه الرجال وقال له ما قال الحاكم عفارم افندم ثلاث مرات .. ؟؟ قال مبارك الا ..

قال خلاص هذي كروتك .. وتراك ماخذ اكثر منا حنا ما قيلت لنا الا مرة او مرتين بس .. وهنا قال مبارك مستغرب ومنقهر وانا وش تفيدني هالكلمة ؟!؟ قال له الرجال والله هذا حاكمنا يكرفنا هالكرف ولا نلقى الا هالكلمة ..

ضاقت الدنيا بمبارك و رجعت له اوجاع جسمه و الجوع اللي كان يمني نفسه انه يبي ينساه سنين بعد ما ياخذ الدراهم الكثيرة .. لكن ما حصل شي ..

راح مبارك لوسط البلد وهو يبي يموت من الجوع و هو في طريقه شاف مطعم فخم .. دخل مبارك و طلب كل الاكل اللي موجود عندهم .. وقال اباكل واذا خلصت وشبعت يصير اللي يصير ..

بعد ما خلص ورجعت له الحياة من جديد جاه القرسون وطلب منه الحساب ...

كان مبارك متكي ومسترخي .. ويوم قال له القرسون هات الحساب تواسا بجلسته و استقعد وقال له بصوت واثق ( عفارم يافندم عفارم يا فندم عفارم يافندم ) ..

القرسون قعد يناظره شوي و هو مهوب مستوعب الفكرة .. قال له الحساب يا اخ ,, رد مبارك بثقة عطيتك الحساب قبل شوي .. قال له القرسون أي حساب .. ؟؟

قال مبارك انا ماقلت لك عفارم يافندم ثلاث مرات .؟؟ قال اقرسون الا .. قال هذي كروتي اليوم كله وعطيتك اياها ..

القرسون قال انت مجنون الظاهر ابروح انادي صاحب المطعم يتفاهم معك .. ولما جا لقى نفس الرد من مبارك وبدت الاصوات ترتفع و مبارك مصر على انه دفع الاجر وافي وكافي و تطورت المشكلة الين وصلت الشرطة تفصل بينهم و لما سمعوا السالفة اخذو مبارك للقصر عشان يحكم فيه الحاكم ويعاقبه على فعلته .. \

الحاكم كان يبي يعرف من هاللي يبي يستحل الاكل بدون اجر ويكابر و يفكر بنوع العقاب اللي يناسب عشان يكون عبرة لغيره ..

دخل مبارك وعرفه الحاكم لانه كان مميز في نهار اليوم بشغله وهمته واستغرب انه يكون هذا هو سبب المشكلة ..

قال له وش اسمك ؟؟

قال مبارك طال عمرك ..

وليه يا مبارك تاكل من عند الرجال اللي تعب واشتغل بكل امانه ولا تعطيه اجره اللي يستحقه ؟

قال مبارك يا طويل العمر انا عطيته حقه وافي .

استغرب الحاكم وقال وكيف يامبارك ؟!

قال انت طال عمرك عطيتنا كروتنا بعد تعبنا وشقانا كل النهار بترديدك عفارم يافندم عفارم يافندم عفارم يا فندم واانا ياطويل العمر اخذت كروتي وسددت بها المطعم ..

هنا الحاكم فهم المقصد وضحك و عرف ان فعله مع العمال غير صحيح وقرر يكافئ مبارك ويرضيه ويترك هالعادة ويعطي كل العمال حقوقهم..

وبدا مبارك حياة عملية جديدة ورجع لاهله بعد ما كسب واغتنى وعاش مع عياله في خير حال والحمد لله

سبحونة ولد التاجر علي بن ناصر

2010-12-14T10:58:00.000+03:00

بسم الله الرحمن الرحيم

كان هناك هاك الواحد والواحد الله في سماه العالي كان فيه واحد اسمه علي بن ناصر .. علي شاب الله منعم عليه بحسن الخلق والخلق وحسن المعشر وكانت لياليه عامرة بوجود الاصحاب و لان علي كريم فهم لا يجدون حرج في قضاء وقتهم والاكل والشرب لدية فهم يحسون من لطافة علي انهم هم اصحاب الفضل ..

غير ان والد علي كان يراقب ابنه بحسرة لانه بخبرته يعرف ان كرثرة الاصحاب لا تعني انهم سينفعونه وقت الحاجة وكان محتار كيف يقنع ابنه بفكرة ان هالاصحاب كلهم ما راح يصفى له من احد ..

وفي يوم قرر التاجر ناصر انه يكلم ابنه في الموضوع واختار وقت يكون الاصحاب بعيدين عنه وقال له ولدي يا علي انا ابي اكلمك في موضوع

علي استقعد وقال سم يا يبة آمر ..

ياولدي انا اشوفك ما شاء الله كل ليلة يجيك اخوياك واللي ما لهم عدد من كثرهم و انا ما عندي مشكلة والكرم يا ولدي صفة زينة والوناسة شي مطلوب بس ياولدي اللي مشغلني شي واحد بس ..

هو كم واحد من هالاصدقاء تعده صديق حقيقي ..

علي ابتسم وقال يبه وش دعوه هذولي كلهم اصدقائي وكاهم يحبوني وانا ما استغني عنهم ولا هم يستغنون عني ..

رد الاب وهو يطالع ولده بجدية اكثر .. انت متأكد يا علي ؟؟

علي ابتسم وقال يا يبه الله يهديك الناس تغيرت وانا يبه زي ما تشوف انسان اجتماعي واحب الرفقه ولا استغني عنهم صراحة .

رد الاب .. يا علي انا ما اقول لك لا تماشيهم اقول لك من منهم تثق فيه وممكن تعتمد عليه بعد الله لو جتك حاجة .. الدنيا ياولدي مهيب مأمونه وفي وقت الضيق ما ينفعك بعد ربك الا الصديق الوقي

انا مثلا ياولدي بعد هالسنسن كلها مالي الا صديق واحد وواحد نص صديق اعتبره انا ..

ضحك علي على سالفة نص الصديق وهو مستغرب من ان هالسنين اللي مرت على ابوه في هالدنيا ما يصفى له الا صديق واحد !!

لكنه ما زال مصر على رأيه وحاول يقنع والده ان الرفقه الكثيرة انفع من الرفقه القليلة واستمر الحوار بين الاب وابنه علي على هذ المنوال حتى توقف الاب عن الحديث وقال يا ولدي يا علي ابي اتفق معك على اتفاق ..

سم يا يبة امرني انت ..

شف يا ولدي انا ابيك تسوي شي مع اصحابك ذولي وهو عبارة عن اختبار واذا صارت النتيجة زي ما تبي فلك على اني ما اكلمك في موضوع اصحابك ذولي ابدا ..

واذا صرت انا صادق وكلامي هو الصح فانت تاخذ طريقتي في الصداقة .. هاه وش قلت ؟؟

قال علي نعم الراي يبه علمني وش تبي وانا حاضر

رد ابوه وقال نبي نسوي لهم اختبار صغير واللي بيوقف معك في هالاختبار تعتبره من اصدقائك واللي ما يوقف معك تراه راعي مصلحة و انت تاخذ القرار اللي يناسبك معه ..

ولما اخبر الوالد ابنه علي عن الاختبار تردد علي و كاد ينسحب من الاتفاق لالوا انه ما يحب يزعل ابوه ابدا ..

ابو علي طلب من ولده انه يروح لمربط الغنم في زاوية البيت الكبير اللي هم عايشين فيه و طلب منه يطلع برا الديرة ثلاثة ايام عشان ينقطع ربعه عنه ويعرفون انه مسافر و في اليوم الثالث يذبح الخروف و يلفه في خيشة ويمد رجليه ويديه عشان يكون كانه جسم انسان وياخذ من دمه ويحطه على ملابسه بشكل يوهم انه قام بقتل الانسان اللي في الخيشة ...

وهذا الي صار ..

دخل علي الديرة في نصف الليل وكل اهل الديرة نايمين و بدا بتنفيذ خطة ابوه والي كان المطلوب منها انه يروح لبيت افضل افضل اصدقائه ويمر عليه ..

صحى سالم على صوت الباب في آخر الليل و حس بخوف من هالطارق الغريب في هالليل .. قرب للباب وصاح من وراه من ؟؟

رد عليه علي بصوت منخفض كانه ما يبي احد يدري انا علي يا سالم افتح بسرعه .. استغرب سالم وفتح الباب وبغى يدخل علي للبيت بس اللي منعه شكل ملابس علي اللي تثير الشك و ساله وش اللي صاير يا علي ؟؟ اختفيت ثلاث ايام و الحين لبسك مليان دم وش صاير ؟؟

قال يا سالم انت خويي الخاص ولا اثق الا فيك .. انا قبل ثلاث ايام صار بيني وبين ابوي مشكلة وطردني من البيت ورحت للبر وجلست هناك عند بدوي ويوم خلصت دراهمي طردني ورفضت اطلع لاني مدري وين اروح له وصارت بيننا هوشة كبيرة وهددني بالسلاح وانا لقطت حصاة كبيرة وهددته بها وهز البندق ومن الصوقه رميت الحصاة في وجهه وهو اللي يموت من الضربة و ييوم شفت سلاحه لقيته ما نوى يذبحني لان سلاحه فاضي .. عاد انا خفت يجون جماعته ويكتشفون من القاتل ويذبحوني ..

سالم تراجع لورا وهو مو مصدق وش قاعد يسمع و حس ان الموضوع حقيقي و ما تكلم الا بعد ما استوعب القصة وقال ووش ناوي تسوي الحين ..

رد علي عليه بصوت الطلب والحاجة .. الحين انا يا سالم مالي الا الله ثم انت وابيك تفزع لي وتدخلني بيتك اختبي فيه كم يوم الين تبرد السالفة و الجثة وزيتها في حوش بيتنا ونبي اطلع انا واياك الحين ندفن الرجال في البر عشان تموت قصته معه .. تكفى يا سالم يا صديقي ..

سالم تنحنح شوي وبلع ريقه واستجمع كل صرامه في جسده ورد على علي وقال .. علي صداقتنا انتهت وانا ما عندي استعداد ادخل الحبس عشان طيشك و هبالك .. انا وراي مصالحي وشغلي

طبعا علي في هالوقت مابين عيونه الا كلمات ابوه ..

لكنه للحين عنده بقايا امل في صديقه .. بس يا سالم انا خويك وانت دايم تقول انك تفديني ببروحك ؟؟

رد سالم بصوت عالي وهو منزعج يا علي ذاك كلام نقوله انت مصدق .. يله رح رح لا يشوفك احد عند بيتي .. ورجع سالم واغلق الباب على طول في وجه علي ..

هنا وقف الوقت وثبت الزمان ورجعت في ذيك اللحظة ايام وليالي قضاها علي مع اخوياه وربعه وكيف كانوا دايم يخلونه في مكانة الامير بينهم وكيف كان كل واحد منهم يدين له برقبته من كثر الخير اللي سواه لهم .. وهذا سالم كان اكثر اصدقائه قرابة له وملازمة .. هو ورفيقهم الثالث سعد..

انتفض علي وقال .. يمكن سالم يخون الصداقة بس سعد ما اعتقد سعد صديقي من ايام الطفولة وطبعه حبيب وهادي خلني اروح له وان شاء الله ما يردني ..

راح علي لبيت سعد وكان الوقت قرب للفجر .. طق الباب فتح له سعد وخاف من شكل علي وبدا بنفس السؤال .. وش انت مسوي يا علي ؟؟

قال له علي السالفة وبعد ما خلص .. رد عليه سعد ..

علي انت صديقي لكن تعرف يا علي ان ابوي مهوب مثل ابوك

انت لو سجنوك بيقدر ابوك بجاهه يطلعك او يخفف عنك اما انا ابروح فيها ويمكن بعد يحطون الحق في رقبتيي ولا راح يشفع لي احد ..

اسف ما اقدر اشترك معك في هالجريمة وانت اخطيت وانا مالي علاقة ..

علي اشار لسعد بالسكوت بعد ما فهم ان سعد مهوب احسن من سالم وعرف علي ان بقية ربعه ما راح يكونون افضل من هالاثنين .. ورجع البيت بعد ما عرف ان الحقيقة وان اعز اعز اصدقائه تخلوا عنه في وقت الحاجة ولما رجع للبيت ما كان يحتاج ابو علي انه يسأل ولده عن النتيجة فنظرة عينه و راسة المنزل للارض وكانه يسترجع وبنفس الوقت يتحسر على الصداقة والوقت اللي راح من عمره وهو كان يعتقد ان كل اللي حوله يحبونه فعلا ..

ابو علي ما اكتفى بهالدرس وحب يكمل لولده الدرس ويخليه يجرب اصدقائه هو ...

قال له علي ابيك الحين تصلي الفجر في البيت والبس ملابسك اللي فيها الدم من جديد ..

استغرب علي .. ليه يبه ؟؟

ابيك تمر ابو محمد واللي يالمناسبة تراه اللي قلت لك عنه انه نصف صديق ..

رح وطق عليه وقل له اللي قلته لاخوياك وشف وش يرد عليك ..

علي فقد الثقة بجميع الناس وهنا ابوه ما كان يبيه يصاب بهالصدمة عشان كذا الجزء الثاني منها انه يعلمة انه فيه ناس تقدر تثق فيهم و تسلمهم رقبتك وتنام ..

علي صلى بعد الاذان مباشرة وانطلق لبيت ابو محمد ولقاه توه يبي يطلع للمسجد ..

شافه ابو محمد واستغرب من هاللي جاي هالحزة ؟؟

قرب علي وسلم على ابومحمد وهو باين عليه الخوف والحزن

هلا هلا والله بعلي بن ناصر ولد الغالي هلابك .. ثم انتبه للدم وقال هه ياولدي وش صاير لك بسم الله عليك ؟؟

رد علي وقال والله ياعم انا صار لي .. ووو وقص عليه كل القصة اللي قالها لاخوياه ..

لكن ردة الفعل كانت غير تماما

بعد ما سمع ابومحمد طرف السالفة دخل علي للبيت وصاح لاهله يزينون القهوة وجلسه في المجلس ..

صليت يا ولدي ؟؟

ايه ياعم صليت قبل اجيك ؟

خلاص يابوي انا ابروح الحق على الصلاة واذا رجعت ابيك تقول لي كل شي وان شاء الله بتنحل ..

علي جلس في المجلس وهو يقارن بين ابومحمد اللي يعتبر نصف صديق بالنسبة لابوه وبين ربعه واخوياه اللي مر عليهم في الليلة اللي فاتت

وفي هالوقت دخل عليه ابومحمد وتقهوى هو واياه ولما سمع كل الاحداث سال علي وين وديت الرجال؟؟

قال له علي انه ما دفنه للحين ..

قال ابو محمد زين يا ولدي ان شاء الله تتدبر الامور وانا ابطلع الحين وابيك تدلني مكان الرجال خلني ادفنه قبل تطلع ريحته وانت اغتسل وابخلي اهلي يجزون لك مكان تختبي فيه ولا راح يعرف احد انك عندي ..

علي كان منبهر من اللي قاعد يسمعه وكيف هالرجال اللي يعتبره ابوه نص صديق مستعد يغامر هالمغامرة كلها ويحط في بيته قاتل و يغطي عنه ..

علي رد على ابو محمد وهو خانقته العبرة وبدا يتشكره على شهامته ..

وفعلا طلع ابومحمد في الليلة التالية وراح لمكان الميت اللي يبي يدفنه و لقى فعلا الجثة ملفوفه بخيشة ومو باين منها شي وشال الميت على كتفه وراح يدفنه في البر ..

لسؤ الحظ ان في هالليلة صارت جريمة قتل حقيقية وصارت الشرطة تحقق في هوية القاتل .. ومن الناس اللي حققو معه صديق علي واللي اعترف على خويه علي وعلمهم انه مر عليه في الليلة الماضية وقال له انه قتل واحد ويعتقد انه هو ..

بدت الشرطة تبحت وتتحرى وتم القبض على ابومحمد اللي رفض يقول أي شي عن علي ..

لكن الشرطة وعلى المعلومات اللي اخذوها من صديق علي .. فتشوا بيت ابومحمد وقدروا يقبضون عليه ..

ولما وقع علي في يد الشرطة راح ابومحمد لابو قاسم صديق ابوعلي الاول واللي يعتبره ابو علي هو صديقه المخلص ..

هلا ابو محمد وش صاير ووش فيك .. عسى ماشر

الحق يابو قاسم علي ..علي بن ناصر ولد خوينا مسكوه وانا كنت حاطه في بيتي بس عرفت الشرطة وقبضت عليه

وانا الان ما ادري وش اسوي ولا ابي ابوناصر يتحسر على وليده ..

ابوقاسم طمن ابومحمد وقال : يابو محمد اذكر الله ورح لاهلك الحين وشف وش اخبارهم ثم الحقني للشرطة وانا ابقول اني انا اللي قاتل الرجال وانت اشهد علي .. فاهم هز ابو محمد راسة بالتاكيد وهو يرتجف من هول القضية اللي قاعدة تصير ولا يبي علي يضيع شبابه في السجن ..

ابومحمد انطلق لبيته وابوقاسم ودع اهله وراح للشرطة واعترف انه هو القاتل و اصر على هذا وقال ابومحمد يشهد وانا كلفته يدفن القتيل عني ..

لما دخل ابوقاسم على علي في الحبس .. كانت مفاجأة كبيرة جدا جدا ان ابوقاسم يوقع نفسة في حكم قد يصل للقتل عشان ولد خويه ؟!؟!

لما تواجه علي مع ابوقاسم ارتمى علي عليه وقال ليه يابوقاسم تبي تودي نفسك للموت عشاني ؟؟

قال ابوقاسم وهو يبتسم .. انت ولد الغالي .. وانا رجال كبير انا انت فقدامك حياة طويلة استغلها بالخير ولا تعيد اللي سوييته ..

في هالفترة طلع النهار وانتشرت الاخبار و و صل علي لبيت ابوه وعلمه بالخبر اللي صار واللي ما كان في الحسبان

وكيف فعل ابومحمد العجيب معه

والاعجب فعل ابوقاسم .. هنا كان المفروض ان ابوعلي يبتسم ويشعر بنشوة الانتصار لكن الموضوع صار له ابعاد ثانية مخيفة و طلع مسرع للشرطة يبي يشوف اذا قدر يقنعهم بفكرته وان القاتل للان حر طليق ..

ولما اخبر ابو علي رئيس الشرطة بالخبر ولانه يعرفه زين ويعرف انه لا يكذب عليه وتعجب من القصة والمصادفة الخطيرة اللي صارت

قال يابوعلي انا ما اقدر اطلق واحد معترف على نفسة بالقتل حتى ولو كان زي ما قلت يبي يحمي غيره ..

لكن رئيس الشرطة ارسل من يبحث عن القاتل الحقيقي ووفقهم الله وقدروا يمسكون القاتل الحقيقي وطلع ابو علي من الشرطه معه اعز اصدقائه ابوقاسم وابو محمد وهو مفتخر فيهم

اما علي عرف ان اخوياه ولو كثروا ربما ما يصفى منهم احد يعتمد عليه

وهنا تعلم درس كبير جدا

وصار يختار اخوياه بحرص وعاش يرببي عياله على هالمبدأ

وصلى الله وسلم على نبينا محمد

انتهت

وشي سباحين ؟؟

2010-12-14T10:52:00.000+03:00

السلام عليكم ورحمة الله

سباحين هي مدونة ابجمع فيها بعض السباحين

ليش سباحين ؟

سباحين هي جت من حاجتي لسرد قصص على عيالي وحبيت تكون من كتابتي عشان اضمن على الاقل خلوها من المحاذير الشرعية والادبية . وهي ايضا ممكن يستفيد منها اي واحد مثل حالتي ويحب يسبحن .

وش معنى سباحين ؟

سباحين مصطلح يستخدمه اهل نجد تعبيرا عن القصة القصيرة واللي غالبا ما تكون خيالية بس ما تخلوا من عبرة ومتعه .. وغالبا الجدات يروون هالسباحين او القصص .

من وين تجيب قصص هالسباحين ؟

صراحة مهيب من راسي كلها خاصة الفكرة الاساسية

اعتمد على قصص من كتاب عبدالكريم الجهيمان (( اساطير شعبية )) وقصص متفرقة اخرى وبعضها بيكون من تالفي وفكرتي .

يعني انت تنقل القصة زي ماهي من كتاب الجهيمان مثلا ؟؟

لا مع انه اريح لي بس للاسف ان الاستاذ عبد الكريم اسلوبه بالفصحى على الغالب ويجيب القصة كما هي بدون تعديل اما انا ابغير في القصة شوي واحذف منها المقاطع اللي ما ابي عيالي يسمعونها :) غالبا اشياء ما تناسب سنهم .. وبيكون سردي بالعامي النجدي

وشي حقوقك الادبية هنا ؟

بما اني غالبا ناقل للفكرة فلكم حرية النقل واكيد اني ابفرح اذا اشرت الى مصدر السبحونه .. والامر سهل وبسيط والهدف الوناسة

بس لا احد يوسع وجهه ويقول انا اللي كاتبها ومنذا الحركات الماصلة .

متى بتنزل سباحينك ؟

والله انا ملتزم بيوم الاربعاء كموعد اساسي ابنزل كل اربعاء سبحونة جديدة والله يعين .. وان ما نزلت فالعذر والسموحة من الحين :)

نقدر نشارك معك .. ؟

الله يحييكم والمدونة مدونتكم بس معليش اذا شفت في السالفة خنابيدز منيب ناشرها

وتقدر تتواصل معي بالبريد الخاص بالمدونة ذي ( SBA7EEN@gmail.com )

اتمنى للجميع المتعه والفايدة

اخوكم

ماجد بن عبدالله المنيع